चुम्लुङ यूकेको १० औँ महाधिवेशनको तयारी तीव्र

लन्डन । किरात याक्थुङ चुम्लङ यूकेको दसौँ महाधिवेशनको तयारी तीव्र स्तरमा बढेको छ । चुम्लुङ यूकेको महाधिवेशन यहीँ सेप्टेम्बर १८ र १९ तारिखमा सम्पन्न हुँदैछ ।

आदिवासी याक्थुङ समुदायको सामाजिक प्रतिनिधिमूलक संस्था कियाचु यूकेको सक्रिय जातीय संस्थाहरूमध्ये एकमा पर्छ । दसौँ महाधिवेशन अल्डरसटको एम्पायर हलमा हुँदैछ । महाधिवेनमा १६ शाखाहरूकोे सहभागिता रहने कियाचु यूकेका अध्यक्ष तिलविक्रम सम्बाहाङ्फेले जानकारी गराए । उनले विदेशमा रहेका चुम्लुङ शाखाहरूका प्रमुख पनि भर्चुअल माध्यमबाट जोडिने जनाए । ‘महामारीबाट सृजित लकडाउन खुकुलो भएसँगै अब भौतिक रूपमा नै भेटेर कार्यक्रम गर्ने वातावरण भएको छ,’ अध्यक्ष सम्बाहाङ्फेले भने, ‘महाधिवेशनले संस्थाको उपलब्धीहरूको समीक्षा गर्नेछ । नयाँ कार्यनीति र योजनाका साथ अझ सशक्त ढंगले बढ्नेछौँ ।’

Advertisement

यसैगरी, चु्म्लुङ महासचिव गणेश इजमले करिब पच्चीस सय बढी पञ्जीकृत सदस्यहरू रहेकोमा सत्र सय बढी सक्रिय सदस्यहरू ममहाधिवेशनमा प्रतिनिधिका लागि योग्य रहेको जनाए । ‘१६ शाखाहरूो विवरण अद्यावधिक हुँदैछ । अब अन्तिम नामावली र विवरण केही दिनमा सार्वजनिक गर्नेछौँ,’ उनले भने, ‘सबै तयारी पूरा भएपछि प्रेस मिटमार्फत् पूर्ण जानकारी दिनेछौँ ।’ यूकेमा करिब पच्चीस हजार बढी याक्थुङ लिम्बु समुदायको बसोबास रहेको विश्वास गरिन्छ । यद्यपि, नेपाली संस्थाहरूसँग जातीय जनसंख्याको अवस्थितिबारे यकिन तथ्याङ्क र विवरण उपलब्ध छैन ।

कियाचु यूकेको स्थापना सन् २००३ मा भएको हो । सेल्सबरीमा भएको याक्थुङहरूको भेलाले चुम्लुङ यूकेको स्थापना गरेको थियो । चु्म्लुङले गत सन् २०१९ मा मेडस्टोनको याल्डिङमा २५.३३ एकड क्षेत्रफलको चुम्लुङ देन(जग्गा) आफ्नै स्वामित्वमा रहने गरी खरिद गरेको थियो । चुम्लुङ यूकेले प्रत्येक वर्ष सिसेक्पा तङ्नामका बेला बृहत् याक्थुङ भेला आयोजन गर्दै आएको छ । यद्यपि दुई वर्षयता भने महामारीका कारण सिसेक्पा तङ्नाम उत्सव हुन सकिरहेको छैन ।