याक्थुङ आइडलको पहिलो संस्करणको फाइनल डिसेम्बर १२ मा

गान्तोक(सिक्किम) । नियारा प्रोडक्सन सुखिमद्वारा आयोजित पहिलो याक्थुङ आइडल ‘सिजन–१’ को फाइनलमा शीर्ष ६ प्रतियोगीले प्रवेश गरेका छन् । यी छ जना प्रतियोगीले आगामी १२ डिसेम्बर २०२१ को दिन रानीपुल मेलाटारमा हुने फाइनलमा प्रतिस्पर्धा गर्ने छन् ।

फाइनलमा प्रवेश गर्ने यी ६ प्रतियोगिहरूमध्ये सुखिमबाट सञ्चमान लिम्बु, सावन लिम्बु, सोहाङ लिम्बु र अञ्जना लिम्बु, आसामकी पिङ्की बेघा र दार्जिलिङका आशिष लिम्बु रहेका छन् । गत नोभेम्बर एकदेखि शुरु भएको ‘याक्थुङ आइडल’ मानुसा टेक्सटाइलले प्रायोजन गरिरहेको छ । गत २६ नोभेम्बरको दिन क्वार्टर फाइनल भएको थियो । जसमा २५ जनाको सहभागिता रहेको थियो । क्वार्टरफाइनलबाट शीर्ष १० जना सेमिफाइनलमा प्रवेश गरेका थिए । सुखिम, दार्जिलिङ तथा आसामबाट याक्थुङ भाषी गायक गायिकाहरूको सहभागिता रहेको थियो । तीमध्ये सुखिममबाट सञ्चमान लिम्बु, सावन लिम्बु, सोहाङ लिम्बु, शाहिल लिम्बू, जगत लिम्बु, लालप्रसाद लिम्बु, अञ्जना लिम्बु र भीमहाङ लिम्बु रहेका थिए भने दार्जीलिङबाट आशिष लिम्बु र आसामबाट पिङ्की बेघा रहेकी थिइन् ।

Advertisement

याक्थुङ जातीको भाषा, संस्कृति तथा गीत,सङ्गीतको संरक्षण एवं विकासमा टेवा पुर्याउने मूल उद्देश्यसहित आयोजित याङ्थुङ आइडल ‘सिजन–१’ मा नेपाली सङ्गीत जगतका प्रसिद्ध गायिका सुनिता थेगिम, सुखिमबाट गायकद्वय सावन लिम्बु र आरएल खाम्दाक निर्णायक मण्डलीमा रहेका छन् । २८ नोभेम्बरको दिन सम्पन्न सेमिफाइनल राउण्डमा अतिथि निर्णायकका रूपमा सरण सावदेनको पनि उपस्थिति रहेको थियो । रानीपुलमा आयोजन भइरहेको याक्थुङ आइडलको सेमिफाइनलमा प्रतियोगिहरूले एकल र युगल गरी दुई दुईवटा प्रस्तुति दिएका थिए ।

स्मरण रहोस् यो याक्थुङ भाषी गीतसङ्गीतको क्षेत्रमा आयोजित ‘याकथुङ आइडल’ पहिलो हो । जसमा सुखिम मात्र नभएर राज्य तथा देश बाहिरका केही गायकगायिकाले भाग लिन सक्ने आयोजक प्रमुख नियारा सुब्बाले बताएकी थिइन् । यसका साथै यस प्रतियोगितामा याक्थुङ जातिले मात्र नभई याक्थुङ भाषा जान्ने बुझ्ने अथवा याक्थुङ भाषाको गीत प्रस्तुत गर्न सक्ने जो कसैले पनि सहभागिता जनाउन सक्ने बताइएको थियो । प्रथम याक्थुङ आइडल सिजन–१ का सम्पूर्ण प्रतियोगीहरूमध्ये ६ जना फाइनलमा प्रवेश गर्न सफल बनेका छन् ।